Polytechnique (2009)

လူတွေဟာ စိတ်အလိုမကျမှုတွေ၊ စိတ်မွန်းကျပ်မှုတွေ၊ ဒေါသစိတ်တွေ အဆုံးစွန်ထိများပြားလာပြီး ဘယ်လိုမှမထိန်းနိုင်တော့တဲ့အခါ တစ်နည်းနည်းနဲ့ ပွင့်ထွက်ပေါက်ကွဲတတ်ကြတာ မဆန်းတဲ့ဖြစ်စဥ်တစ်ရပ်ဖြစ်ပါတယ်။ အဲ့လိုဖိစီးမှုတွေများလာတဲ့အခါ အချို့က တရားဓမ္မနဲ့ ပွင့်ထွက်စေသလို၊ တချို့က လောင်းကစား၊ အရက်မူးယစ်ဆေး၊ အပျော်အပါးတွေနဲ့ ဖြေလျှော့တတ်ပြီး တချို့ကျတော့လည်း တေးဂီတ၊ ရုပ်ရှင်တွေနားဆင်ကြည့်ရှုတာမျိုး၊ အပန်းဖြေခရီးထွက်တာမျိုးတွေနဲ့ အဆင်ပြေသွားတတ်ကြပါတယ်။

ဒါပေမဲ့ တချို့လူတွေကတော့ စိတ်ထဲမှာအရမ်း overwhelmed ဖြစ်လာတဲ့အခါ တခြားသူတွေလို နည်းအမျိုးမျိုးနဲ့ဖြေသိမ့်ဖြေလျှော့နိုင်စွမ်းတွေမရှိကြပါဘူး။ သူတို့ဟာ များသောအားဖြင့် စိတ်ပညာသဘောတရားအရ introvert (အတွင်းကြိတ်) တွေဖြစ်လေ့ရှိကြပါတယ်။ အဲ့လိုလူတွေဟာ အတွင်းအဇ္ဈတ္တရဲ့ပူလောင်မွန်းကျပ်မှုကို တကိုယ်လုံး စိတ်ရောကိုယ်ပါ အကူးစက်ခံပြီးတဲ့အဆုံး၊ မတတ်သာတဲ့အဆုံးမှာတော့ နောက်ဆုံးထွက်ပေါက်ဖြစ်တဲ့ သေကြောင်းကြံတာမျိုးတွေ လုပ်တတ်ကြပါတယ်။

တချို့အဲ့လိုလူမျိုးတွေကတော့ မိမိကိုယ်ကိုလည်း သေကြောင်းကြံသလို မိမိဘက်ကမတရားဘူးလို့ယူဆတဲ့အရာ၊ မိမိဒုက္ခတွေရဲ့ အရင်းအမြစ်လို့ သူ့ဟာသူယူဆတဲ့အရာတွေကိုပါ တပါတည်းအဆုံးသတ်ပြီးမှ သေကြောင်းကြံလေ့ရှိသလို တချို့ကျတော့လည်း အဲ့ဒီအရာတွေပေါ်ကို စိတ်လွှတ်ချပေါက်ကွဲပစ်လိုက်ရုံနဲ့ နှစ်သိမ့်ရာရသွားတတ်ကြတာမျိုးလည်းရှိပါတယ်။

ဒါတွေဟာ ယနေ့ခေတ်မှာ ကျွန်တော်တို့မကြားချင်ဘဲကြားကြားနေကြရတဲ့ လက်နက်မဲ့သူတွေအပေါ် အကြမ်းဖက်မှုတွေ၊ စာသင်ကျောင်း၊ ပွဲတော်ပစ်ခတ်မှုတွေ၊ တစ်ကိုယ်တော်(lone wolf) တိုက်ခိုက်မှုတွေရဲ့နောက်ခံအကြောင်းတရားတွေထဲက တစ်ခုပဲဖြစ်ပါတယ်။

၁၉၈၉ ခုနှစ်၊ ဒီဇင်ဘာလ ၆ ရက်နေ့မှာ ကနေဒါနိုင်ငံ၊ ကွီးဘက်ခ်ပြည်နယ်၊ မွန်ထရီရယ်မြို့မှာ ပစ်ခတ်မှုတစ်ခုဖြစ်ပွားခဲ့ပါတယ်။ Ecole Poly technique မှာဖြစ်ပွားခဲ့တာဖြစ်ပြီး အမျိုးသမီး ၁၄ ယောက်သေဆုံးကာ နောက်ထပ်အမျိုးသမီး ၁၀ ယောက်နဲ့ အမျိုးသား ၄ ယောက် ဒဏ်ရာရရှိခဲ့ပါတယ်။ ပစ်ခတ်သူ Marc Lepine ဆိုတာ ဣတ္ထိယပဓာနဝါဒဆန့်ကျင်ရေးသမားတစ်ယောက်ဖြစ်ပြီး ပစ်ခတ်မှုကျူးလွန်ပြီးတဲ့အခါမှာ သူ့ကိုယ်သူလည်း သတ်သေသွားခဲ့ပါတယ်။ အဲဒီပစ်ခတ်မှုကြောင့်ပဲ ကနေဒါနိုင်ငံမှာ သေနတ်ကိုင်ဆောင်မှုနဲ့ပတ်သက်ပြီး စည်းမျဥ်း၊ စည်းကမ်းတွေ ပိုတင်းကျပ်သွားခဲ့ပါတယ်။ ဒီပစ်ခတ်မှုဖြစ်စဥ်ဟာ ကနေဒါနိုင်ငံမှာတော့ ၂၀၂၀ ပြည့်နှစ် Nova Scotia တိုက်ခိုက်မှုမတိုင်ခင်အထိ လူအသေအပျောက်အများဆုံး ပစ်ခတ်မှုဖြစ်စဥ်ဖြစ်ပါတယ်။

အခုဇာတ်လမ်းလေးကတော့ အဆိုပါ ၁၉၈၉ ခုနှစ် ပစ်ခတ်မှုဖြစ်စဥ်ကို အခြေခံပြီးရိုက်ကူးထားတဲ့ ဖြစ်ရပ်မှန်ဇာတ်လမ်းဖြစ်ပါတယ်။ ဇာတ်လမ်းတစ်ခုလုံးကို သေနတ်သမားနဲ့ ကျောင်းသားနှစ်ဦးဖြစ်တဲ့ ဂျေအက်ဖ်နဲ့ ဗယ်လာရီတို့ရဲ့ ရှုထောင့်ကနေ တင်ဆက်ပြသထားပါတယ်။ ပါဝင်ထားတဲ့ သရုပ်ဆောင်တွေကတော့ Maxim Gaudette၊ Sebastien Huberdeau၊ Karine Vanasse၊ Evelyne Brochu၊ Johanne Marie Tremblay၊ Pierre- Yves Cardinal တို့ဖြစ်ပါတယ်။ ဒါရိုက်တာ Denis Villeneuve ကရိုက်ကူးပေးထားပြီး ဇာတ်ညွှန်းကိုတော့ Jacques Davidts နဲ့ ဒါရိုက်တာ Denis Villeneuve တို့ကိုယ်တိုင်က ရေးသားထားပါတယ်။ အင်္ဂလိပ်၊ ပြင်သစ် ဘာသာစကားနှစ်မျိုးနဲ့ ၂၀၀၉ ခုနှစ် ဖေဖော်ဝါရီမှာ စတင်ပြသခဲ့ပြီး မကြာခင်မှာပဲ ၂၀၀၉ ခုနှစ် ကိန်းစ်ရုပ်ရှင်ပွဲတော်မှာ ဝင်ရောက်ပြသခဲ့ပါတယ်။ ၂၀၀၉ ခုနှစ်မှာပဲ Toronto Film Critics Association ရဲ့ Best Canadian Film ဆုကိုဆွတ်ခူးခဲ့သလို ၂၀၁၀ ခုနှစ်မှာလည်း Genie Awards နဲ့ Juntra Awards ကချီးမြှင့်တဲ့ ဆုအများအပြားကို ရရှိထားပါတယ်။ Genie Awards ဆုကိုးဆုထိရခဲ့ပြီး ထင်ရှားတဲ့ဆုကတော့ Best Motion Picture ဆုဖြစ်ပါတယ်။ ကုန်ကျစရိတ် ဒေါ်လာ ၆ သန်း အကုန်အကျခံရိုက်ကူးထားတဲ့ဇာတ်ကားဖြစ်ပြီး IMDb rating 7.2၊ Rotten Tomatoes 88% နဲ့ Metacritic rating 63% ရာခိုင်နှုန်းရထားပါတယ်။

ဒီဇာတ်ကားကို ဖြစ်စဥ်နဲ့အနီးစပ်ဆုံးတူညီအောင်ရိုက်ကူးတင်ဆက်ထားတာဖြစ်ပြီး ဖြစ်စဥ်အကြောင်းအရာဘက်ကို အသားပေးတင်ပြထားတာဖြစ်လို့ တခြား drama ပိုင်းတွေကို အနည်းငယ်လျှော့ထားသလို cinematography ပိုင်းမှာလည်း အဖြစ်မှန်ကို ပရိသတ်တစိမ့်စိမ့်ခံစားမိစေဖို့၊ ဒါရိုက်တာပေးချင်တဲ့ message ကို တွေ့ထိခံစားမိစေဖို့ black and white mode နဲ့ scene တစ်ခုချင်းစီအလိုက် သေချာလေးရိုက်ပြထားပါတယ်။ ကျွန်တော်တို့အနေနဲ့ ဒီဇာတ်ကားကြည့်ပြီး ခေတ်မီတိုးတက်လှပါတယ်၊ ဒီမိုကရေစီလူ့အခွင့်အရေးထွန်းကားလှပါတယ်ဆိုတဲ့ ချမ်းသာတဲ့အနောက်နိုင်ငံကြီးတွေမှာ ဘယ်လိုမညီမျှမှုတွေ၊ ဘယ်လို အကျင့်သီလနဲ့ လူ့ကျင့်ဝတ်ပိုင်းဆိုင်ရာ ချွတ်ချော်ဖောက်ပြားမှုတွေ များနေကြပြီလဲဆိုတာ ဆဝါးရင်း အတွေးနယ်ချဲ့ကြည့်မိကြလိမ့်မယ်လို့ ထင်ပါတယ်။

File size…(1.2 GB)/(624 MB)
Quality….Webrip 1080p / 720p
Format…mp4
Duration….01:17:00
Genre…Crime, Drama, Thriller
Subtitle….Myanmar Subtitle (Hardsub)
Encoder….Mr. Anderson
Translated by Ninja